Levantase o pano da veda para troita e ciprínidos
MILLEIROS DE
GALEGOS ESTARÁN PENDENTES DOS NOSOS RÍOS ESTE DOMINGO
Milleiros de galegos, uns en grupo, outros en parella e moitos
en solitario, estrearán este domingo, 15 de marzo, a temporada de pesca
continental en Galicia. Unha veda que se levanta para peixes e troitas, e que terá
como punto de arranque pouco despois das seis da mañá. Todo un acontecemento
que ninguén quer perderse e que será seguido, ben directamente por ser practicantes
ou familiares; ou de maneira
indirecta a modo de curiosidade,
por unhas 60.000 persoas.
Todo elo a pesar de
que as perspectivas, segundos entendidos, non son nada optimistas
principalmente debido o negro panorama troiteiro que quedou o rematar a campaña
precedente.
Todo un hábito que
forma parte do emocionante deporte da pesca. Como tamén o forma o que a meirande
parte dos canistas non logre conciliar o sono días antes do levantamento do pano da veda. Ver amencer o
pé do río. Ou conta-las habituais mentiriñas o remata-lo exercicio pesquil, son
outras das costumes do colectivo da cana e o cesto.
A troita, un ano máis,
diante do retraso da apertura para pesca do salmón e do reo (non se abre ata o
1 de maio, agás no Eo que comezará igual que en Asturias), será a “raíña de
paixóns” nestes primeiros compases da campaña piscícola; pois os ciprínidos ou
“peixes” (bogas, escalos, etc.), se ven tamén se poden pescar a partir deste
domingo, non pasan de ter a consideración de “pezas de consolación”, a pesar de
resultar a súa pesca especialmente entretida e moi positiva dada a súa
abundancia. Certo, tamén, que non estamos na mellor época para tentala súa
picada. Polo tanto os seus incondicionais haberán de agardar a que quezan as
augas para exercer esta especialidade.
Por outra banda, os
mellores trofeos troiteiros atoparémolos nos ríos máis grandes e, sobre todo,
nos encoros, puntos de referencia dos exemplares máis corpulentos. De feito cada ano “salta a sorpresa”
nalgún deles “enganchándose” nos primeiros lances da campaña algún que outro
individuo que sempre marca ás diferenzas.
Tocante os mellores
cauces troiteiros, a meirande parte dos pescadores coruñeses elixen o Mandeo, Anllóns e o Tambre. Os ourensáns
decantanse polo Arnoia, Xares e Arenteiro. Os lucenses escollen o Eo, Miño, Navia e o Lor. E os
pontevedreses quédanse co Lérez, Úmia,
oitaven e Deza.
Referente os enganos
máis axeitados, tal e como van os ríos, a miñoca, alí onde o seu emprego non este
prohibido, ha ser a que mellores resultados reporte. En artificiais, o mosquito
casque podemos descartalo dado a friaxe das augas, mentres a culleriña e o peixe artificial onde haxa fondura, deberían
ser os máis efectivos nesta desveda.
De tódolos xeitos, nesto
da pesca, o igual que noutras facetas da vida, a sorte xoga sempre un gran
papel e polo tanto será ela a que determine os resultados deste estreo, tan
ansiado e agardado por un colectivo que creou unha atmosfera máxica que
presidirá, como cada empece, o amencer deste domingo.
En resumo, que este
día 15 converterase nun domingo “sagrado” para os máis de 60.000 discípulos de San Pedro. Os
que, con renovados bríos e xa non digamos ansias, “patearán” desde o alba ata o
ocaso os 10.000
kilómetros de correntes fluviais con que contamos en
Galicia.
Así as cousas, ríos,
regueiros e encoros, ademais de ter asegurado o “abarrote”, serán escaparates de esperanzas e
tristezas, de sosegos e presas, de ilusións e vanidades, de alegrías e
fracasos., que de toda haberá mañán neses ríos do Señor.