MEDIO RURAL DUPLICA O NÚMERO DE TRAMPAS QUE
DISTRIBUIRÁ ESTE ANO CONTRA A VESPA VELUTINA
- A conselleira Ángeles Vázquez asinou
hoxe un acordo de colaboración polo que achegará material ás catro
asociacións apícolas de Galicia, ás que agradeceu a súa colaboración na loita contra este insecto
- O reparto de trampas comezará
mañá mesmo e a través das oficinas agrarias comarcais chegará tamén aos
apicultores non asociados
Santiago- A conselleira do Medio Rural,
Ángeles Vázquez, formalizou esta mañá o acordo coas catros asociacións apícolas
de Galicia para levar a cabo a distribución de trampas e de botes de líquido
atraente contra a vespa velutina, un reparto que comezará mañá mesmo e que
neste ano 2017 dobra o número de aparellos. A consellería achegará máis de 5.600
trampas e as súas correspondentes monodoses de líquido atraente contra este
insecto, que se suman ás máis de 5.000 repartidas nos últimos dous anos.
O reparto faise
despois de reunirse con todas as entidades implicadas e chegar a un acordo polo
cal Medio Rural repartirá as trampas en función do número de colmeas e das
zonas afectadas. Así, a Asociación Galega de Apicultura (AGA) recibirá 2.273
trampas e 13.638 monodoses de 10 mililitros de líquido atraente, destinadas a
1.119 asentamentos apícolas. A Agrupación Apícola de Galicia, 539 trampas e
3.234 monodoses para 251 asentamentos apícolas. A Asociación Provincial Lucense
de Apicultores (APLA), 240 trampas e 1.440 monodoses destinadas a 130
asentamentos apícolas e, por último, a Asociación Abellas Nais disporá de 95
trampas e 570 monodoses para 37 asentamentos apícolas.
En total,
serán 3.147 trampas as que recibirán estas asociacións para repartir entre os
seus socios, pero os apicultores non integrados en agrupacións tamén contarán
con estes aparellos. Así, a través das Oficinas
Agrarias Comarcais distribuiranse outras 2.512 trampas para 1.651 explotacións.
En total, en toda Galicia só neste ano vanse poñer 5.659 trampas, co seu
correspondente líquido atraente, destinados a un total de 3.188 asentamentos
apícolas.
Neste
sentido, Ángeles Vázquez, insistiu na importancia de que sexan os expertos os
que coloquen e fagan a distribución deste material dado que a instalación de
trampas en zonas nas que non se coñeza a presenza desta especie ou a utilización
dun número excesivo das mesmas vai supoñer que se capturen indiscriminadamente
outras especies de insectos, coma a nosa vespa común, a única que pode loitar
contra a invasora.
Por iso, a
conselleira agradeceu a colaboración das asociacións de apicultores tanto á
hora de diferenciar os niños como co apoio de persoal e mesmo realizando
directamente a retirada de niños, en colaboración con outras unidades
integradas no plan de vixilancia de control da vespa velutina. “Darlles as grazas
pola vontade que tiveron de chegar a un consenso neste acordo e agardo que
sigamos na mesma liña polo ben dos apicultores e do ecosistema”, declarou a
titular de Medio Rural.
O reparto de
trampas é unha das actuacións prioritarias que desenvolve Medio Rural dentro do
plan de vixilancia e control dado que se trata de un sistema exitoso para a
captura de raíñas. Cada raíña capturada significa un niño menos no contorno. Pero
non é a única vía de loita deste programa. Ademais da retirada e inactivacións
de niños (9.508 niños durante o 2016 en toda Galicia), lévase a cabo campañas
de formación e de divulgación e apóstase pola investigación en colaboración coa comunidade
científica e coas universidades galegas para mellorar o coñecemento sobre o
ciclo biolóxico e o comportamento deste insecto.
