§
Activo un lume no concello de Ourense, parroquia de Palmés,
no que foi declarada como medida preventiva a “Situación 2” porque pode afectar á poboación e a bens non forestais, pola
proximidade a núcleos habitados
§
Controlado o lume no concello da Mezquita, parroquia de
Santigoso, que afecta a unha superficie provisional de arredor de 100 hectáreas
en terreos de Rede Natura
§
Permanece estabilizado o lume no concello de Entrimo,
parroquia de Galez, cunha superficie de arredor de 20 hectáreas
§
Permanecen controlados os incendios rexistrados nos concellos de
Folgoso do Courel, parroquia homónima, e de Navia de Suarna, parroquia de
Ribeira, con superficies provisionais de 195,33 e 410 hectáreas respectivamente
§
No lume rexistrado no concello lugués da Fonsagrada, parroquia de
Bruicedo, extinguido á 1:20 horas desta madrugada, un helicóptero do Servizo de
Incendios tivo que realizar unha aterraxe de emerxencia nun prado por problemas
técnicos, sen que houbese danos persoais nin materiais
Activo Ourense
A Consellería
do Medio Rural e do Mar declarou ás 17:45 horas, como medida preventiva, a
“Situación 2” no incendio forestal activo arestora no concello de Ourense,
parroquia de Palmés. Esta situación operativa de emerxencia declárase porque o
lume pode afectar á poboación e a bens non forestais e require a adopción
inmediata de medidas de protección e socorro. O lume iniciouse ás 16:03 horas e
afecta, segundo estimacións provisionais, a unha superficie de 40 hectáreas. No
seu control traballan 3 axentes forestais, 12 brigadas, 4 motobombas, 6
helicópteros e 10 avións.
Deste lume
foron evacuados un axente forestal e un brigadista a causa
dunha posible intoxicación por fume. Ambos foron trasladados conscientes a
senllos centros médicos da capital ourensá e evolucionan favorablemente.
Na zona do incendio atópase o secretario xeral
do Medio Rural e Montes, Tomás Fernández-Couto, para coordinar tanto os traballos de
extinción como as medidas de protección adoptadas.
Controlado A Mezquita
Está
controlado desde as 14:00 horas deste mediodoía o lume rexistrado no concello
ourensán da Mezquita, parroquia de Santigoso, tras comenzar esta madrugada ás
00:08 horas. Segundo as últimas estimacións provisionais, a superficie afectada
é de arredor de 100 hectáreas en terreos de Rede Natura. Nos labores de control
levan traballado 5 axentes forestais, 12 brigadas, 7 motobombas e 1 pa.
Estabilizado Entrimo
Segue estabilizado
desde ás 22:00 horas de onte un lume no concello ourensán de Entrimo, parroquia
de Galez, tras comenzar ás 17:37 horas desa mesma tarde. Segundo estimacións
provisionais, a superficie afectada é de arredor de 20 hectáreas. Nas tarefas
de control levan participado 5 axentes forestais, 16 brigadas, 7 motobombas, 6
helicópteros e 5 avións.
Controlado Folgoso do Courel
Continúa controlado
desde as 22:40 horas o incendio iniciado o pasado sábado ás 19:18 horas no
concello lugués de Folgoso do Courel, parroquia homónima. Segundo estimacións
provisionais, a superficie afectada é de 195,33 hectáreas en terreos de Rede
Natura, das cales 8 son arboradas e 187,33 de monte raso. Nas tarefas de extinción
levan participado 3 técnicos, 19 axentes forestais, 44 brigadas, 27 motobombas,
2 pas, 7 helicópteros e 3 avións.
Controlado Navia de Suarna
Permanece
controlado desde as 11:20 horas de onte o incendio rexistrado no municipio
lugués de Navia de Suarna, parroquia de Ribeira. Este lume iniciouse o sábado
ás 17:27 horas e segundo estimacións provisionais a superficie afectada é de 410
hectáreas en terreos de Rede Natura, das cales 310 son arboradas e o resto
rasas. Na súa extinción levan traballado 1 técnico, 13 axentes forestais, 49
brigadas, 26 motobombas, 1 pa, 10 helicópteros e 6 avións. Tamén colaboraron
nas tarefas de control membros da Unidade Militar de Emerxencias (UME).
Incidencia na Fonsagrada
Por outra
parte cabe destacar que no lume rexistrado no concello lugués da Fonsagrada,
parroquia de Bruicedo, extinguido á 1:20 horas desta madrugada e que afectou a
unha estimación de superficie de 28 hectáreas, un helicóptero do Servizo de
Incendios tivo que realizar unha aterraxe de emerxencia nun prado por problemas
técnicos. Non se rexistraron danos persoais nin materiais.