Máis de 700 persoas se unen pola defensa dos océanos

Este pasado venres 8 de xuño Día Mundial dos Océanos máis de 30 entidades sumánronse á iniciativa Únete e limpa a túa praia! proposta  por ADEGA  no marco da programa “Playas, voluntariado y custodia del Territorio”. da Fundación Biodiversidad"

Dende Nigrán ate Ribadeo, grandes e pequenos saíron ás súas praias nunha xornada de limpeza simultáne que pretende concienciar á cidadanía da necesidade de reducir o consumo diario de plástico, reutilizar o máximo posible e reciclar.

Dende as 9 da mañá as limpezas fóronse desenvolvendo en todo o litoral galego. Houbo centros de ensino, escolas de surf, ONG ecoloxistas, asociacións culturais, asociacións de mulleres rurais e ata mergulladores. Todas e todos tiñan o mesmo fin, limpar a praia e crear conciencia. Foron milleiros de kilos os que se retiraron das praias a maioría de orixe plástico. Cordas de todo tipo, aparellos de pesca, caixas, botellas, tapóns, e outros tantos restos que rematan cada día no mar.

Alén da Limpeza nalgúns lugares a xornada tamén serviu para dar a coñecer a importancia e biodiversidade dos areais e dos ecosistemas dunares; fixéronse tarefas de identificación dun pequeno golfiño riscado (Stenella coeruleoalba), aparecido morto na praia de Queiruga, e localizáronse niños de pillara das dunas (Charadrius alexandrinus) que se sinalaron, para evitar o seu pisoteo, observáronse tamén os adultos  desta pequena, bulideira  e ameazada ave.

O plástico nos océanos afecta á flora e fauna mariña, nomeadamente para algunhas especies ameazadas como cetáceos, tartarugas ou aves mariñas, xa que inxiren plásticos confundíndoos con alimento. Tamén poden acabar enredados en bolsas, sacos ou redes que lles provocan graves lesións, dificultades para moverse e, finalmente, poden causar a súa morte. Outro dos problemas é que o plástico acaba desfacéndose en pequenos anacos que son inxeridos por peixes que poden rematar nos nosos pratos. Isto fai que os compoñentes tóxicos e perigosos dos plásticos pasen aos seres humanos, afectando directamente á nosa saúde.

Moito do plástico que se atopa nas praias e nos océanos do mundo chega alí despois de ser usado por calquera de nós. É por iso que debemos reducir o noso consumo de plástico para evitar que de un xeito ou outro remate nos océanos. Moitos dos envases que utilizamos cada día son innecesarios e prescindibles. É posible mercar os nosos produtos a granel, escoller os recipientes de vidro e retornables, rexeitar as bandexas de poliestileno, etc. pequenos xestos que axudan a que o noso planeta non sufra tanto.

ADEGA quere subliñar que as limpezas de praias no día dos océanos non debe ser un feito aillado, e convida a calquera persoa a recoller o lixo do noso litoral sempre que poida. A limpeza de praias debe facerse de xeito manual, respectando os ecosistemas dunares, e tendo especial coidado coa fauna e flora que nelas habita. Deste xeito poderemos reflexionar sobre a orixe dos nosos residuos e evitar que rematen nos estómagos de animais.

ADEGA editou para esta actividade un protocolo de actuación para unha limpeza de praias “ecolóxica” descargable en pdf na nosa web, ou que se pode recoller en papel no local.

 

Concello	Praia	Colectivo	Nº de voluntarios	Kg retirados
A Coruña	Praia Canide	OMA-UDC	12	250
Arteixo	Praia de Alba	Asoc. Cult. Monte da Estrela e ADEGA Coruña	14	100
Barreiros	Praia Area Longa	ADEGA Mariña Colabora: Colectivo Cultural Ollomao	9	400
Burela	O Perdouro	Colectivo Cultural Buril	3	200
Burela	O Perdouro	IES Perdouro	50	-
Camelle	Praia de Camelle	CEIP de camelle	30	300
Carnota	Praia de Corna Becerra	Raínha Lupa Plataforma pola defensa do Patrimonio de Quilmas ADEGA Costa da Morte	7	200
Ferrol	Caranza	ADEGA Ferrolterra	25	100
Fisterra	Langosteira	IES Fin do Camiño	43	150
Foz	Praia os Alemáns	Mariña Patrimonio, Pomba do Arco, Karrikanta e Sensación Surf Escola.	12	200
Muxía	Praia dos Muíños	CEIP Os Muíños	Adiada (50)
Muxía	Praia O Lago	Programa de voluntariado do concello de Muxía	10
Nigrán	Praia América	CEMMA	38	200
Nigrán	Praia de Patos	Prado Surf Escola	32	60
Ortigueira	Praia S. Antón de Espasante	Asoc. cultural Bangalúas	25
Poio	Praia de Lourido	ADEGA Pontevedra	20	80
Porto do Son	Praia de Queiruga	ADEGA  Nacional	10	200
Porto do son	Praia dos Castros	-	6
Ribadeo	Areal de Rinlo	Asociación Rinlo Bai	5	200
San Xenxo	Area de Agra	C.E.I.P. Magaláns-Dorrón	60	100
Valdoviño	Praia de Pantín	Pantin Surf Camp	12
Vigo	Marina Dávila	Buceo Balea	8	60
Vilanova de Arousa	O Terrón	IES A Basella	150	390
Viveiro	Praia de covas	Espazo Agroecolóxico A Estruga Asoc. Mulleres Rurais “Fraga das Saímas” I.E.S Mª Sarmiento I.E.S Vilar Ponte	100	150
Laxe	Praia de Traba	IES Maximino Romero de Lema	24	150
		TOTAL	705	3490