XUNTANZA

O presidente da FGC asiste o Consello Forestal de Galicia

Lexislación | Temas: Xuntanzas, Consello Forestal

28/5/2013 O consello tivo lugar na mañá de onte día 27 de maio A conselleira do Medio Rural e do Mar, Rosa Quintana, presidiu onte a reunión do Consello Forestal, na que se trataron, entre outros temas, a presentación do Plan de prevención e defensa contra os incendios forestais de Galicia (Pladiga 2013). O Consello Forestal de Galicia é un órgano consultivo e asesor da Administración Forestal no que están representados, ademais da Xunta, produtores, industria forestal, Fegamp e diferentes organizacións vinculadas, entre as que se atopa a Federación Galega de Caza, representada neste consello polo seu presidente Javier Nogueira Diz. O Pladiga 2013 deste ano presenta unha continuidade, nas súas liñas xerais, con respecto ás últimas campañas anti-incendios, sendo tanto os medios humanos coma os materiais moi semellantes aos empregados en anos anteriores. Entre as principais novidades, este ano destaca a clara aposta do departamento autonómico en materia de colaboración con outras entidades e administracións, co obxectivo de aumentar a prevención e defensa nos nosos montes partindo da eliminación dos riscos que poden ser orixe dos lumes e da súa propagación, neste senso o plan recolle o convenio de colaboración asinado, o pasado 4 de marzo, coa Federación Galega de Caza para a participación na prevención e defensa contra os incendios forestais mediante accións preventivas sobre a poboación e sobre o territorio, así como de vixilancia preventiva, detección, disuasión e investigación no marco do PLADIGA, en liñas xerais ao acordo de colaboración ten por finalidade divulgar e concienciar do risco dos lumes entre os cazadores e as sociedades de caza, e a colaboración do colectivo cinexético cos servizos de prevención e extinción de incendios forestais.

Gabinete de Comunicación
Federación Galega de Caza